ألبوم الأسرار (قراءة) فهد المساعد


http://www.3bq.com/vb/imgcache/13059.png


{ فهـــد آلمســـآعد }


والتفاصيل الصغيره ..!


والسحابه .. وآخر درووبه /..ومشاويره !


والعذر وكل الاسرار الجميله ..



أقدم لكم ألبوم /.. الاسرار ..!



تحت الارض أح ب ك


مي هذي مثل طلّ الصبـح لأغصـان الحدايـق
يبتسـم قطـر النـدى لاباسـتـه أو باسـهـا
مي هذي بنت لامن شفت صدر الليل ضايـق ..
أدري ان عيون مـيّ اليـوم طـال نعاسهـا
من هنا تصحى ويصحى الحب في عيون الخلايق
ومن هنا تغفى وتنسى الارض ضحكـه ناسهـا
يسعد الله قلب ميّ اللي كثـر ماهـوب بايـق ..
..من قلوب الخلق..مااذكر مـرّ يـوم وداسهـا
لأن مي أرق بنت..ولو قسـت ماهـوب لايـق
حيّرتني مي..الأجمل : هـي..والا أحساسهـا
بالها لاضاق زانت..كيف لامن صـار رايـق
في انتباهتها براءه..كيـف اجـل هوجاسهـا
العمر لو كـان ضحكـه مـي تكفينـي دقايـق
بس اخاف ان مت..تحني مـي فوقـي راسهـا
مي لـو تبكـي لموتـي مالـي الا افـز فايـق
من قبل لاامـوت أكثر..مـن نشيـج انفاسهـا
مي .. لاتعطين بال لمن يقـول المـوت عايـق
الجسـد موتـه يفـك الـروح مـن حراسهـا
ماأحبك فـوق الارض وبـس ياكـل الخلايـق
حتى تحت الارض أحبـك يابعـد مـن داسهـا
مي لو ماقلـت فيهـا بيـت واحـد ماتضايـق
لأن مالي شعـر ينشـر لـو رفـض كراسهـا

[ الاسـرار .. ]

يا رفيف الماء .. وفجر العيـد .. وأحـزان الموانـي
يا أكثر أهل الأرض طيبـة قلـب .. وأسـرار دفينـه

المكـان اللـي هنـا .. مليـان ضحكـات ، وأغانـي
والكـلام اللـي بغيـت أقـول .. يحتـاج لـ سكينـه

شوفي الركـن البعيـد هنـاك .. كنـه صـدر حانـي
هـذا هـو اللـي يليـق بـ شاعـر و بنـت حزينـه

أنسـي الشـارع ، وعتمـات الزوايـا ، والمبـانـي
هاتـي يدينـك نلـف الغـيـم و نشـكـل مديـنـه

عنـدي الليلـة كـلام و صمـت .. وأخـاف الثوانـي
تظلمه .. أو تظلـم اللـي فيـه كـم ضاعـت سنينـه

بـس لازم تسمعـيـن الـلـي أبــي ولا تـرانـي
لو بـ أعيده لك .. نسيت .. ورحت أقول اللي تبينـه

شي واحد قبل ما أبـدأ .. مـا أبـي أي شـي ثانـي
يخطر فـ بالك .. وأنا أكشف لـك شعـور تجهلينـه

إن أنا .. وبكـل مـا تحملـه " أحبـك " مـن معانـي
كنت ، وراح أبقى أحبك .. لين .. مدري وش هو لينه

بـس والله ماقـدرت أنسـى .. ولا همـي نسـانـي
لا ذكـرت إنسـان .. فيـه أسـرار مابينـك وبينـه

كـل مـا تطـري علـي فكـرة هــواك الأولانــي
أشعـر إنـي أنطعـن مليـون مـره مـن يديـنـه

أشعـر إن عيونـك .. الله مـا خلقهـا إلا عشـانـي
كيف كانت تبتسـم لـه.. قولـي إنـك تخدعينـه

صورة إنـه كـان يمسـح دمعـك .. تزلـزل كيانـي
وكيف كـان يلـم شعـرك .. ويتبعثـر فـي يمينـه

حتى اسمـك يـوم رحـت أدلله .. حظـي رمانـي..
بنفس الاسم اللي يقول .. بذمتـك ماهـي غبينـه

وكنـي اللـي .. كـل مـا أناديـك بالاسـم الفلانـي
أطلـب النسيـان .. يتـرك منـه شـي تذكرينـه

لا تظنينـي أنانـي .. لا .. أنـا مانـيـب أنـانـي
لو سلمت من الغرق . بـ أمـوت فـي ظهـر السفينـه

يا إني ما أكمـل وأعانـي .. أو أكمـل ثـم أعانـي..
كل ما اسمع طاري اسمه .. أو تجي عيني في عينـه

أينا كـان الضحيـه .. وأينـا اللـي كـان جانـي
مـدري .. ولكـن قـراري لازم إنــك تقبليـنـه:

مثـل مـا أكـره فكـرة إنـه واحـدٍ ياخـذ مكانـي
ما أقدر أجلس في مكـان إنسـان.. كنتـي تعشقينـه


[ آخر دروبـــي .. ]

يا بشر تكفـون حلّـو عـن سمايـه
ما يصيب الهرج لو الهـرج صوبـي



كـم سكـت لكـم بمـا فيـه الكفايـة
اشتموني لو زعلتـوا واشمتـوا بـي


عيبونـي واتركونـي فـي عمـايـه
واتركوا لي واحـد يرضـى عيوبـي



اتركـوا لـي واحـد يمسـح شقايـه
كل ما حـط الزمـن دوبـه و دوبـي


ذاك والله لـو ذكـرت انـه ورايــه
اشعر إن الكـون كلـه وسـط ثوبـي


يكفـي انـه لـو يسولـف للمرايـه
كن صوته يهمس لـ صورتـه.. ذوبـي


كيف أنا مـا أذوب مـا دامـه معايـه
اسمعه و أسهر معـه لآخـر دروبـي


كل مـا قـال السهـر درب الغوايـة
قلت كلـه مـن عيونـك هبّلـوا بـي


وكل ما قـال الخطـا ماهـو خطايـه
قلت له قـل للعيـون السـود توبـي


ضيعتـنـي واســأل الله الهـدايـة
وين أجيب العقل.. أجيبه من جيوبـي


من يعرفـك مـا يـدل العقـل رايـة
يا شروق العمر.. مدري يـا غروبـي


أذكر انك كنـت لـي مثـل الهوايـة
لو تروح ولو تجـي يبقـى شحوبـي


بس مدري كيف صرت اليـوم غايـة
وصرت أجي و أروح مدري عن دروبي


يـا بعـد عمـر الكتابـة و القـرايـة
يا الشمالـي يابـو الملـح الجنوبـي


لا قريـت اللـي كتبتـه يـا رجايـه
رح وبلغ ربعـي اللـي جننـوا بـي


قلهـم يمكـن يخـلـون الوشـايـة
و إن تمادوا خلهم مهمـا حكـوا بـي


أنت خلك بـس فـي الدنيـا عزايـه
لا تفكر في العـواذل وأنـت صوبـي


ادري إن كـل درب ولــه نهـايـة
بس أنا باقـي معـك لآخـر دروبـي
 


العـذر ..}



يعني كـذا يـا أم الوفـا والمحبـه
كـذا المحبـة والوفـاء ياوفـيـه
أغيـب عنـك أيـام ولا أتنـبّـه
إلا وانـا أشوفـك زعلتـي عليـه
وش زعلك وش هز قلبك وشبه
يعني عشاني غبت صارت قضيه
ياام القوام اللي مـن أدنـاه هبـه
يميـل كـن الخيـزران أدمـيـه
وأم الجديل اللي من يخـاف ربـه
يذكـر عليـه الله ويذكـر نبـيـه
إن كنت مخطـي فالخطـا مايجبـه
إلا العذر وانـا اعتـرف بالخطيـه
وهذي بعد من فوق الأعذار حبـه
لا تزعلـيـن الله يخلـيـك لـيـا 


الغــربه .!


ياخي أذا الحب عيب ! فـ شفني آنادي :


سجل ..... أنا من عرف عيبه وجاهربه


وسجّل هنا كلمةٍ تستاهل عنادي


بقولها قبل أسافر وأترك التربه :

والله ماأقسى من الغربه عن ابلادي

الا .. شعوري وانا فـ بلادي بالغربه  



*.بسم الله عليك .*


جيت في ليلة وداعه تايه ٍ بين البيوت


صحت وينك جيت اوادع عمري اللي ضاع فيك


ماسمعت الا صدى صوته وكان ارق صوت


ينطق اسمي ثم يهمس من متى وانا احتريك

قلت وهمومي تغافل زفرت الحزن وتفوت

هذا انا جيتك ياليت الموت جاني قبل اجيك
بعدها يادوب عدة عبرته حد السكوت
قال وعيونه تغارق دمع بسم الله عليك
قلت يابن الناس عادي ماورا هالموت موت
وش وراها لافقدت عيونك ولمسة يديك
 
{.. تعال

من عز نومي صحيت وشفت في عينـي
دمع تهادى علـى جفنـي وأنـا غافـي
ستـرت دمعـي بـ كمـي قبـل يغرينـي
وأخذت هذا الجسد مـن باقـي لحافـي
وسريـت تايـه ورا خطـوات رجلينـي
لا الوجه وجهي ولا أوصافي هي أوصافي
أمشـي وأقـول لـ طريقـي لا توديـنـي
لـ عيون ناس تبي تـدري عـن الخافـي
أمانتـك.. خلهـا مـا بينـك وبيـنـي
خابرك يالـدرب خـوة عمـر وسنافـي
مـا ودي النـاس تـدري وش يبكينـي
كرامة النفـس ورث أبـوي و أسلافـي
أمشي وأحس الخناجـر فـي شرايينـي
والبرد يمشي وراي وينهـش اطرافـي
وحيـد واللـيـل بـردونـه يغطيـنـي
تقـول كـن البلـد روح بهـا السافـي
إلين ما أوحيـت لـي صـوت ينادينـي
صوت أعرفه مثل ما أجهل وش خلافـي
قمـت أتلفـت و انــادي لا تخليـنـي
ما غيره.. الصوت هذا صوتـه الدافـي
ولمحت زوله من أقصى الـدرب لافينـي
مدري وش اقول لكن حـي هـا اللافـي
تعال.. شف غيبتك كيـف أثـرت فينـي
تعال.. شفني وأنا أغرق عقب مجدافـي
تعال.. خذنـي ورحبـي مـن عناوينـي
تعبت أعدي على جمـرك وأنـا حافـي
تعال واقطف بصوتـك زهـرة سنينـي
كـل المواعيـد عقبـك شمعهـا طافـي
تعـال وازرع خصـل شعـرك بكفينـي
بضمهـا ليـن أحـس بليلـك الظافـي
تعال وشفيـك خايـف أنـت ناسينـي
قطعت صوتـي عليـك وطـال ميقافـي
حتى بديت أشعـر أن الحـب معمينـي
وان أنت حلم عثى فينـي وأنـا غافـي
لكن أمانـة تـرى اللـي فـي كافينـي
إن رحت منك كذا مـا رحـت متعافـي
بصـدق الحلـم وأحـذر لا تصحيـنـي
في خاطـري كلمتيـن إن قلتهـا كافـي
أمانة الله عليك إن غبـت عـن عينـي
لا يكون قلبك مثل قلـب الزمـن جافـي
مع كـل دمعـة تذكـر رعشـة يدينـي
ومع كل ضحكـة تذكـر قلبـي الوافـي


" .تمنيت مووتك. "


اللي بقا لـي فـي غيابـك .. سكوتـك
واللي فقدتـه مـن غيابـك .. حنانـك
عـذرك معـك لوخبـرونـي بمـوتـك
وحقي عليك ان كـان عـذرك زمانـك
ماكان موعد .. وأعـذرك لـو يفوتـك
أنـا انتظـرت العمـر كلـه عشـانـك
غبت ورضيت .. وبعدها .. غاب صوتك
وأبطيت أكذب .. من يقولـون : خانـك
بالله كيـف تحـس فـي طعـم قوتـك
لامن ذكرت إنسان .. خنته .. وصانـك
ماكـن قلبـه واحـد مــن بيـوتـك
من تحت سقفه كـم شعـرت بأمانـك
وراك خليتـه .. لعتـمـة سكـوتـك
وأنا مـا غيـر أعشمـه فـي حنانـك
فـي غيبتـك ياكـم تمنيـت مـوتـك
أقل شـي .. أرتـاح وأعـرف مكانـك
 
حبيت أوضح لك ..}

في عز ماكنت أهوجس فيك وافتح لك


أبواب قلبي خذتني رجلي لبابك



وجيتك وأنا مااذكرإني كنت رايح لك



بس اذكر أني كذا لاطول غيابك

ياما ترددت مدري كيف بشرح لك

أجيك وارجع. .أبيك تقول وش جابك
يابن الأوادم ترى مليت ألمح لك
أنا أعزك. .وأحبك. .وأعشق ترابك  



سؤال ؟ ~

لا تكدر خاطرك ضيقة حبيبك يوم قال..


أيه أحبك يابعدهم .. بس أنا وين أغدي..؟؟.

ضيقتي ما هي بس اليوم يابنت الحلال ..

ضيقتي لها ثلاث سنين تاكل من يدي ..

ضيقتي مافي وفاها يابعد عمري جدال ..

كل ليلة تبسط يديها وتفرش مرقدي ..
.
ودي اسكت بس اعرف الحظ لا من مال مال ..
لي متى والصمت ينهش في ضلوعي وجسدي ..
.
شوفة عيونك .. هموم وضيق خلق وقل حال ..
وش اسوي دام حظي يابعد عمري ردي ..

~. سحابه . ~

جف الكلام ومـدت يدينهـا فـوق : ..
.. أخترت هذي .. وأنت شف لك سحابه
قلت .. ويديني تحتضنها مثل طوق .. :
أختـرت هـذي هـذي أكثـر رحابـه
هذي دفا صوتٍ مـن البـرد مخنـوق
هذي سـؤالٍ نصـف عمـري جوابـه
هذي هي اللي عرّفتني علـى الشـوق
هذي قدر .. ماكنـت حاسـب حسابـه
قطعة حزن في جيب بالـي ومشقـوق
ومضة فرح في عيـون نـاسٍ غلابـه
أن سولفت فـي ثغرهـا لمعـة بـروق
وإن سرّحت في عيونها صمـت غابـه
واليا اضحكت نورٍ من الفجر مسـروق
واليـا بكـت تحـزن عليهـا الكآبـه
حبي لهـا لـوأدري ان فيـه مخلـوق
قدّ حبّ مثلـه .. قلـت : "ياللغرابـه"
هـ الآدمي من وين له قلـب و عـروق
والصبر هـ المسكين مـن ويـن جابـه
وأنـا أتكلّـم .. ردّت عيونهـا فـوق
ثم تمتمت : من هي هـ الأكثـر رحابـه
قلت ويدينـي تحتضنهـا مثـل طـوق
فـي ذمتـي ما شفـت غيـرك سحابـه
  

سكة الذكرى الحزينه ..}

مرّني طيفـك .. وطيفـك صاحبـي مـدري عـدوّي
جايبٍ صوتك .. وصوتـك سكـة الذكـرى الحزينـة



قال أنا جوّي تكـدّر .. قلـت : ماهـو كثـر جـوّي
قال فرقانا غبينـة .. قلـت : وأكثـر مـن غبينـة


قال : أنا بـ أموت من غيبتك قل لـي ويـش أسـوّي
قلت : أنا أبغى الموت في غيبتك .. قل لي بس وينه



قبل ترحل .. كنـت أقـول بيسـرح أيـام و يضـوّي
مثـل ماعودنـي اليـا اشتقـت لـه جابـه حنينـه


بـس هـ المـرة ثمـان شهـور وضلوعـي تــدوّي
كل يوم أشتاق لك .. يلعـن أبـو الشـوق وسنينـه


كـل ماعشمـت قلبـي .. قـال ياآآ ضلوعـي تقـوّي
ورحـت أنـا ويـاه نرقـب رجعـة اللـي فاقدينـه


نوب أقـول اليـا رجـع بكـون فـي قمـة هـدوّي
ونـوب أقـول الا أبزعـل وأتلـى مابينـي وبينـه


كل يوم أجلس علـى جـال البحـر وأقـول تـوّي ..
.. لاسألني : مافقـدت الحلـم فـي لمسـة يدينـه


مادريـت أن البحـر ماقـال لأمـواجـه تــروّي
و مادريت أن الغـرق هـو حجّـة غيـاب السفينـة


مادريت .. أو مابغيت أدري .. ولاأدري وش بسوّي
لو رجعت .. وشفت طيفك فـي الممـرات الحزينـة


وين ابنسى وانت طيفـك صاحبـي مـدري عـدوي
مارضى يتـرك لـ غيـره شبـر واحـد فـي المدينـة



# عين بدويّ #


يا الحقيقه في الزمان الممتلي كذب ورياء


مابقى لي غير كلمه قبل ما الصوت يهوي


أقسم برب البروق اللي كما مبسم هيا إنك اغلى من بكور الوسم في عين بدوي ...

 

[ مشاوير ]


ياقلب طالت قسوتك وأنت ليّن ..


في قسوتك /.. ياقلب ..وش أنت لاقيّ !!



التفاصيل الصغيره ,,}
ازعل عليك احيان
وأزعل على نفسي قبل ماأزعل عليك



وأرضى عليك احيان
وأرضى على الدنيا وانا راضي عليك


وأنت عمرك
مازعلت .. وماعتبت ... ومارضيت


أزعل علي لو كذب
أعتب علي لو كذب



هذي التفاصيل الصغيره
اللي تخلينا نحب


ماأحب انا ازعل عليك
ازعل انا لأني احب


***


ياأدفي من حروف الشعر
ياأرق من حلم السنين


إذا تركتك تنتظر
حسسني إن انتا حزين


مابي تقول مسامحك
قل : ماأبيك


وإذا رجعت اصافحك
أبعد يديك


أنا انجرح قبل اجرحك
وأبكي عليك


لكن أبي مره تحس
وشلون أنا أمووت فيك


هي التفاصيل الصغيره
اللي تخلينا نحب


ماأحب أنا أقسى عليك
أقسى أنا لأني أحب


***


أدري فيك تموت فيني
وأنا ميت من برودك


لي متى وانتا تبيني
وما تحسني بوجودك


ايه ... حسسني بوجودك


لمّ صوتي
بعثر حكاية سكوتي



لاتخلي الحب يفقد همسك العذب ويمووت


قل احبك ..


قل احبك


بأعلى صوت


انا مليت السكوت


***


ياإبتسامة قلبي ولهفة حنينه
يا شقاه ويا حنانه


يابعد كل المسافات الحزينه
معك امانه


الدروب اللي مشينا .. لاتضيع وتغترب


بالتفاصيل الصغيره
نقدر نعيش الحب


.{ وحــدهـ بوحــدهـ }..
ياغايـبـه وان كــان فيـهـا جمـالـه
تجمّـلـي يــاام الـحـلا والظـفـايـر



بالله شوفـي صاحـبـك كـيـف حـالـه
شوفيه فـي غيبتـك وشلـون صايـر


صارت حياته ضيـق خلـق .. و بطالـه
هم .. وسهر .. واوراق شعر .. وزقاير



يعنـي حبيبـك صـار حالـتـه حـالـه
مابـاقـي الا انــه يــدّن العـبـايـر


الله لامـنّــه ذكـــر مـامـضـالـه
قـبـل الـدوايـر ماتـجـر الـدوايــر


يـوم الطفـولـه والشـقـا والجهـالـه
يـوم الصغايـر فـي عيـونـه كبـايـر


ايــام كــان معـانـده راس مـالــه
ويسـوق لهـبـال الشـقـاوه بشـايـر


يامـا امتلـى بالحـب والطيـش بـالـه
ويامـا امتلـت مـن شخبطتـه العوايـر


يكتـب عليهـا : ( عااااشقـك للثمالـه )
ويخـطّ توقيعـه : ( جريـح الضمايـر )


يامـا اشتكـاه ابـوك فـي بيـت خالـه
ويامـا تحصّـل مـن هـواك العـزايـر


مـره حـلـف بـأنـه يبّـطـل هبـالـه
وقبـل يكمّـل .. فـك اخـوه الستـايـر


ثـم طالـع الشـبـاك.. ليـنـك قبـالـه
وفي اقل من لمـح البصـر جـاك طايـر


علـى صغـر سـنـه ممّـيـل عقـالـه
كااااشـخ وناسـي لايـصـك الـزرايـر


لاشـافـك يتمـتـم لحـالـه بــ حـالـه
لعيـون هـ الشوفـه تـهـون الخسـايـر


ولاشـاف زول ابـوك حــذّف نعـالـه
الحـب جايـر .. لكـن الـعـود جـايـر


طفـلٍ يتيـم ورغـم الأحــزان دالــه
مايـدري ان حظـه مـع الوقـت بـايـر


كنتـي طموحـه .. كنتـي أغلـى حلالـه
كنتـي وصرتـي بـس يـاام الظفـايـر


طفـلٍ زرع مـن ضحكتـك فـي خيالـه
ليـن اثمـرت شعـرٍ هـزالـه حـرايـر


لاتتركيـنـه فــي غيـابـك لـحـالـه
بالله شوفـي كيـف هـ الطـفـل صـايـر


ووحـده بـ وحـده كـان عنـدك عـدالـه
اتبّطلـي غيـبـه .. و ابـطّـل زقـايـر 

1 التعليقات :

Ahmed alfarha يقول...

قلم مميز .. وبووووح جميل .. دمتي متألقه ومميزهـ يامبدعه

يكتـب عليهـا : ( عااااشقـك للثمالـه )
ويخـطّ توقيعـه : ( جريـح الضمايـر )

احترت وش اقتبس مالقيت الا هالبيتين هذي الي اشكرك وبعنف عليها ..! تقبلي مروري ودي لك

إرسال تعليق

لاتقرأ وترحل ..
بل ضع لك بصمة في المكان قبيل الرحيل ..